এই পোস্টটি ৩৬৫ বার পড়া হয়েছে


দীঘিনালা ডিগ্রি কলেজঅর নবীন বরণ অনুসতানঅত মুই যে কধাআনি কুইওঙ

কিল্লে ০৪ সেপ্টেম্বর, ২০১৪ বিসুববার দীঘিনালা ডিগ্রি কলেজঅত পিসিপি আর এইচডব্লিউএফ-অর পোইদেনে কলেজ কেমপাসঅত নুও ভুত্তি উইয়ে ইসটুডেনউন্দোই এগ্গান নবীন বরণ অনুসতান গরা উইয়ে। সিওত কয়েকজনঅ সমারে পার্টি পক্কত্তুন মুইও উবস্তিত এলুঙ। সিওত আরঅ এলাক ইউপিডিএফঅর দন্ত ত্রিপুরা, পার্বত্য নারী সংঘ’র সভাপতি সোনালী চাঙমা, উপজেলা চেয়ারম্যান নবকমল চাঙমা, কলেজঅর ভাইস প্রিন্সিপাল তরুন চাঙমা, পিসিপি’র বিপুল চাঙমা, অংকন চাঙমা। সভানানুন উইয়ে রুপেশ চাঙমা।
সিওত মুই যে কধাআনি তুলি ধুজ্জোঙ সিআনি লিঘঙর-
মুই সিওত চাঙমা আর বাঙালঅ কধান্দি কধা কুইওঙ।
মুই কুইওঙ, আমার হিল চাদিগাঙঅ দুঘি মানেইউনে দুঘঅত আগন, তারা জাগা গজগ গরা হাদন, ধেই জে পাদন, ওত্যেচার গরা হাদন, তারা ধে ধে পোল্লে পোল্লে থেই পাদন।
ইচ্চে তারা এই দুঘত জুনি হিল চাদিগাঙঅর গাবুজ্জে ইসটুডেস বা ছাত্রউনে চোকমুফুত্তে ন থান, তারা জুনি নিজর জাদর ভালেদত্তেই লাড়েইওত ন এজন, মিছিল মিটিঙঅত ন জান তোইলে তারার লেঘাপড়ার কী দরকার! সিত্তুন বরং তারা লেঘাপড়া ন শিঘিনেই গরু চোরেলেই অহয়। ইসটুডেন বা ছাত্রসমাজঅরে সচেতন অহবার প্রয়োজনীয়তা বিষয়ে মুই এ কধাগান কুইওঙ।
তারপরে মুই কুইওঙ- তিন হিল ডিসটিগঅত লেঘাপড়ান্দি আমি হুব নাদান ওইনেই আঘি। এবার এইচএসসি পরীক্কেত যে রেজাল(রেজাল্ট) বাইর উইয়ে সিওত দেঘা জিএদে, হিল চাদিগাঙঅত মোদেমাদে ২৮ আন কলেজঅত্তুন বানা ২৫(২৮) জন ইসটুডেন জিপিএ-৫ পিওন। আর বাগি অন্য জেলাআনিত গড় পাস-অর হার জিওত বেচ সিওত হিল চাদিগাঙঅর তিন ডিসটিগঅত হুব কম। বানা ৬৬.৬৬ পারসেন। গোদা দেজঅত পাজঅর হার অহলদে ৭৬.০০ পারসেন।
আমা হিলঅত কিত্তেই এত্তমান হারাপ রেজাল অহর?
অহত্তে কারণ অহলদে, আমা উগুরে শাসকচক্রর খড়গ সবসময় থাই। আমি জ্যাক্কেনে উধিবার চেরেস্তা ‍গিুরি সেক্কেনে তারা আমারে নানাভাবে তলে ফেলে রাঘেবার চা’ন।
আমি জ্যাক্কেনে মদ-গানজা-হিরোইন-ইয়াবা ইত্যাদি নানাধুক্কেন মাদকঅর বিরুদ্ধে সমাজঅত কাম গুরি স্যাক্কেনে শাসকচক্র সে গম কামআনিত বাধা দ্যে। তারা আমারে কোচ পেবার নাঙে আমারে ত্যক্ত গরন, আমারে দুক দোন।
সে বাদেও জেলা পরিষদ নাঙে জে প্রতিষ্ঠান আঘে সিওত তারা দালাল পুজঅন। তারা সিওত সে দালালউনোরে দিইনেই সমাজঅরে দুর্নীিতিগ্রস্ত গরন। এ দালালউনে সরকারঅর উগুরেত্তুনো হান। তারা সমাজঅর মানজোত্তুনো হান। তারার কারণে ইচ্চে হিলঅর প্রাইমারী ইশকুলঅত গম মাস্তর আর পা ন জায়। তারা ৪/৫/৬/৭ লাক তেঙা ঘুষ লােইনেই মানজোরে চাগুরি ধোরেই দোন। যারা সেই চাগুরি পান তারা মাস্তরি পেবার পরে ঘুষ দিয়ে তেঙাগুই তুলিবার নাঙে চাগুরি নাঙে বেআর গরন।
দুলো ধুজ্জে দালাল জেলা পরিষদঅর কারণে ইচ্চে হিল চাদিগাঙঅর লেঘাপড়া হুব তলাত পুজ্জে। ইচ্চে আমি গম পো শা ন পে’র আর।
গড়ে জিওত অন্তত মধ্যম লেভেলঅর পো পেবার কধা সিওত সিআন পা ন জাই।
সরকারে ইচ্চে এনজান গুরি দুলো ধুজ্জেউনোরে দিনেই আমা কাঙেল ভাঙি দ্যার। যারা উগুরে জাদঅর ভবিষ্যত নির্ভর গরে তারার কাঙেল ভাঙি দ্যার।
মুই কু্ইওঙ, আমাত্তুন ইআনি বিষয়ে সচেতন চোকমুফুত্যে ওই পুরিবঅ।
নবীন বরণ অনুসতানঅত ৩০০/৪০০ মতন ইসটুডেন এটেন গুজ্জোন। তেম্বাঙ সভা শেজ অহবার পরে এগ্গান সাঙইসকিতিক অনুসতানঅ গরা অহয়।

Advertisement