এই পোস্টটি ৩৪২ বার পড়া হয়েছে


রণজিৎ দেবানঅর ইন্টারভিউ- যা যা যা উড়ি যা, ও মন সার‌ল্যা চীললো

ইউটিউবঅত রণজিৎ দেবানঅর সাক্ষাতকার লোইনেই এ লেঘাআন লেঘা উইয়্যে-

রনজিৎ দেবান, হিল চাদিগাঙঅর আধুনিক গানঅর পোল্লেম শিল্পী ক’লেও কোআ জাই। তা গানউনোত জেনজান গুরি জাত-সমাজঅর প্রতি কোচপানাহ কধা ইচ্চে সেনজানগুরি কনঅ হুব কম গানঅত সিআনি  এ ন পারে।

তারে লোইনেই তা ইন্টারভিউ লোইনেই ইউটিউবঅত এগ্গো ডকুমেন্টারি আঘে। সিআন ইচ্চে ০৯ মে , ২০১৫ ইং চেলুঙ। চেইনেই গম লাগিলঅ।

সে গম লাগানার কধা ব্লগঅত লিঘি রাঘাঙর।

২০১৩ সালঅর ২৩ সেপ্তম্বর অত ইউটিউবঅত তা ইন্টারভিউআন ফগদাঙ গরা উইএ। রাঙাবেল মিডিয়া নাঙে এগ্গো মিডিয়া গোষ্ঠীত্তুন ফগদাঙ গরা উইএ। নির্দেশনা বা ডিরেকশন দিএ ইজেবে জারা নাঙ আঘে তারা অহলাক, জিমি চাঙমা, সলিত চাঙমা।

ইন্টারভিউআনঅর পোল্লেমঅত গান এগ্গো আঘে। রনজিৎ দেবানঅর নিজঅর গলায়। সিওত ত্যা কঅর, ও মর সার‌ল্যা চীললো বোইয়্যেরে বোইয়্যেরে মেঘে মেঘে যা যা উড়ি যা, ইচ্চেমুই উড়ে দিলুঙ, সীমিনে পাড় ওই যা, মনঅ পঅরঅ সদগে।
ত্যা সে পরে কঅর, মর কিয়্যেআন যে ন পারোক, মনান অহলে জোকনা।
চিগোন থাগঅত্তে জ্যাককেনে কাপ্তেই গদা ন বানান, ডেবাবো ন এলঅ স্যাক্কেনে কধা ত্যা কঅর। ত্যা কঅর স্যাক্কেনেত্তুন ধুরি ত্যা গান গা’দে কোচ পেদঅ, গান শুনিদঅ।
একবার তা গান লিগিএ হাতাবো তার জ্ঞাতি পেজেঙাপুত ভেইএ আগুনঅত দিইনেই পুড়ি ফেলেইএ।
ত্য ত্যা গানঅর প্রতি তার কোচপানা সারি নহ পারে।
কেলাশ নাইন বা টেনঅত জ্যাক্কেনে রাঙামাত্তেআন ডুবি নহ জাই, স্যাক্কেনে রাঙামাত্তে বাজারঅত পরে তবলসুরি বাজারঅত দূরঅ আদামঅত্তুন জুম্ম চাঙমা মিলেউন সুদো কাবরঅর বুন্যা ঝলালোই তারা কিএত্তুন অজল অজল তুলো বুগিলোই বাজারঅত এদাক সিআনি দিঘিনেই ত্যা পোল্লেম গীত রোজেইএ-

ঐ হৈ হৈ জুমঅত জেবঙ-জুমঅত জেইনেই ঘুচ্যা সুদো তুলিবঙ, ঘুচ্যা সুদো তুলিনেই তেঙা কামেবঙ।

তার রোজেইএ দ্বিতীয় গান অহলঅদে, মনান যদি পেক্কো অহদঅ দূর দেজঅত উড়ি জেদঅ, কুদু কী অহর, কুদু কী ন অহর, এক্কো ধাবাই চে’ এদঅ…

ত্যা কঅর, ইআনঅই সত্য হিল চাদিগাঙঅত রনজিৎ দেবানঅর চাইতে সুপার সুপার গলা আঘন আমা চাঙমা জুম্ম জাদঅর , কিন্তু সিউন জতনঅর অভাবে পুরি আঘন।

জুম্ম জাদঅর অধিকার আদায়অত জ্যা পধ দেঘেইএ সেই নেতা মানবেন্দ্র নারায়ণ লারমা কধা রণজিৎ দেবানে তা ইন্টারভিউত স্মরণ গুজ্জে। জ্যাক্কেনে বাঙলাদেজ স্বাধীন অহলঅ, সে পরে ত্যা পাহাড়ি ছাত্র সমিতি’ত ত্যা ভত্তি উইয়্যে। স্যাক্কেনে ত্যা কালচারাল লিটারেরি সেক্রেটারী এলঅ। ত্যা কঅর, গিরিসুর শিল্পীগোষ্ঠী নাঙআন দ্যা দে মিসেস প্রতিমা চাঙমা। গিরিসুর শিল্পীগোষ্ঠীবো মাধ্যমে তারা গানঅর চজজা গুজ্জোন। ত্যা আরঅ কঅর , মর সৌভাগ্য সেই গিরিসুর শিল্পীগোষ্ঠীবো ম আহদঅত জম্ম। সিআন ১৯৭৩ সালঅর কধা।

তারপরে মাইসছড়ি হাইস্কুল, পুজগাং-দিঘীনালা-লুঙুদু সুমুত্তো ভালক জাগাত তারা পাহাড়ি ছাত্র সমিতির ব্যানারে সাংগঠনিক সফর দোন। নিজঅ মাতৃভূমিরে দিঘিনেই সিত্তুন ধুরি তার দেজ জাত কোচ পেবার অনুপ্রেরণা ইচ্চে। তার কধায়, এক কধায় মর দেচপ্রেম ভাবআন আহরে আহরে ক্যাএজে ক্যাএজে সুম্মে।

সে পরেই তার অমর গীতউন ত্যা রোজেইএ। সিউন অহলাক- ও মর সনার দেচচান, ন চাঙ জেবার এই জাগাআন ছাড়ি/সারি, মুড়োমুড়ি ফারিনেই সরা/ছড়াগাঙ চিরিনেই, আমা দেচচান মুড়োমুড়ি গাঙে ছড়ায় ভরা, আমা দেচচান মুড়োমুড়ি সাগর আঝায় গড়া।

ত্যা কঅর ম মনান মুই সারল্যা চীল বানেনেই ছাড়ি দোঙঘে, জিআনঅত বাঙলাদেজঅর সীমানা নেই, ভারদঅর সীমানা নেই।

ত্যা কঅর মুই জে জাদঅত জে সমাজঅত জোনমেইওঙ। সে জাদঅল্লাই সে সমাজঅল্লাই মর এগ্গান দায়বোধ আঘে।

আমা হিল চাদিগাঙঅর ভেইএ ভেইএ মারামারি লোইনেই কধা ক’দে ত্যা কঅর, জ্যা জে ধারার রাজনীতি গোত্তোক না কেনঅ, তাই বলে আমি মনানি কিত্তেই ভাঙাভাঙি গুরিবঙ?

নিজে গান গেই শোনেইনেই ত্যা কঅর, নুও দিনওর গীত শুনাগোই-নুও আঝালোই বুক বানি দো। নিরাজার দুগ ঝাড়িফেলদোক-মনঅ রেগাবো জরা দি দ্যো। পিত্তীমি সভাত জাগা লঅবার, কোচপানা সুদোলোই গিরে বানদোক ব্যাগে মিলিনেই আহদে আহদে। যা যা যা উড়ি যাআ, ও মন সার‌ল্যা চীললো।

সে পরে ত্যা এ সময়অর জুম্ গাবুজ্জেউনঅর দেচ জাদঅরে কোচপানা ন গরানা উগুরে ত্যা কিজু কধা কুইএ। সতর্ক গুরি দ্যে, তুমি আহতালিএ আহবাআ বাজি ওইনেই ফুচ গুরি উগুরে  উদিনেই ফুচ গুরি পুরিবা, শেজ অহবা।

ত্যা কঅর, জাতীয় চেতনাবোধঅর অভাবঅর কারণে মৌলিক সুরে গান লেগানা গান জরানা ন অহর। ত্যা কবার চিএ,  জাতীয় চেতনাবোধ ধারণ গুরিলে্, কোচপানা গানঅ সমারে দেচপ্রেমঅ কধাও আনি পারে।

ব্যাগে তা এ সাক্ষাতকারআন ইউটিউবঅত চেবাক এই আঝা থেলঅ- লিংক

 

 

 

 

 

 

 

Advertisement