এই পোস্টটি ৫০৯ বার পড়া হয়েছে


কাররে মনত দুগ দিবার মর মুঞ্জুক নেই, বানা বিজকঅর চেতনা চিমচিম্মে ধার গুরি রাগেবাত্তেই মুই বড় কধা কোই পাঙ

ব্যক্তিগতভাবে কার’ মনত দুগ দিবার মর কোনো মুঞ্জুক নেই। হালিক মনেঅহয় তারপরেও কারোরে দুগ দোঙ- হবর পেনেই বা ন পেনেই। অথবা মুই যে চিদে গরঙ বা যে চেতনা লালন গরঙ এবং সিআনদোই আরঅ অন্যজনঅর চিদে ন মিলিবার কারণে আদর্শিক অবস্থান ঠিক রাঘাদেও হয়ত কাররে দুগ দোঙ। হালিক যেকোনো ভাবে যে কারোরে দুগ দোঙ দিদুঙ সাত, মুই আজলে কারো মনত দুগ দিনেই নিজরে হুজি মনে গুরি ন পারঙ।

ইচ্চে এই কধাগান কোই পাঙত্তে অহলদে চাদিগাঙ ইনভারসিটির মাস্তর ডাঙ্গু আনন্দ বিকাশঅর এগ্গান লেঘা লোনেই। লেঘাগান লোনেই মর প্রতিক্রিয়া পোস্ট গুরিবার পরে কয়েকজনে মর কধা বা মন্তব্য গমে নহ নেজান। বা আনন্দ বিকাশঅর লেঘাগানঅরে “ফালতু” কনাগান তারা মানি লোই নহ পারন।

গেআনঅত আনন্দ বিকাশ চাঙমারে মর দিগত্তুন মনত দুগ দিবার কোনো মন নেই। হালিক অত্তে অত্তে এমন অবস্থাত পরা পরে যে, নিজর রাজনৈতিক চেতনা বা চিদেরে বা জাদর মান সম্মান সংক্রান্ত চিদেরে মানজো চিদত ফুদে দিবাদ্দেই সে মনত দুগ দেনা হামআন ন গুরিলেই ন অহয়!

আমি জুনি জাত হোলেবার চেই তোইলে  নিজ’ জাদর আরাঙ বা সয়সমবদ-আনি লোনেই আমার জানা থানা দরকার। এগ্গো জাদে কী জিনিচ লোনেই বারবো গুরি পারে? তার আল্যাক(সংস্কৃতি), সাইত্য, বিজক(ইতিহাস), লোড়বো বিজককোই দ ত্যা বাড়বো গুরি পারেদে। সিআনিই আমার সমবদ, সিআনির জাদর আরাঙ। সে আরাঙ বা সমবদ লোনেই কনঅ কধাবাত্তা কদঅ গ্যালে তারে বারবো গুরি নাঙ গরা পরে। বাঙাল জাদে তার বিজক তুলি ধুরিবার গ্যালে আগে তার লাড়েইওর বিজক বানা নাঙ ঘিনি পারেদে। কুবোত ত্যা মাধা নিজু গুজ্জে, কন জাগাত কননা আপোষ গুজ্জে বা গুজ্জোন সিআনি তারা লাজে নাঙ ন ঘিনোন।

আমা হিল চাদিগাঙ বা আমা জুম্ম জাদরঅ জা বার গুরিয়ে বিজক আঘে সিআনি লোনেই দ আমার বার গরা পরে। সিআনি দোলে সাজেই তুলি রাঘা পরে!

ডাঙ্গু আনন্দ বিকাশঅর লেঘাগান পুড়িনেই জ্যাক্কেনে দিঘিলুঙ, তা লেঘাত ১৯৪৭ সালঅত আমা জুম্মউনোর ভূমিকারে ত্যা অন্যভাবে আঁগেবার চিএ, মানে ত্যা কবার চিএ, স্নেহকুমার চাকমা, ঘনশ্যাম দেবার দাঘি জা গুজ্জোন সিআন ‘রম বা গোয়ার মানজো কাম’ সিআন পুড়ি মত্তুন গম নহ লাগে। তারা পাগিস্তানঅত থেবার ন চেনেই ভারতঅত থেবার চিওন, সিআন হারাব কিজু চিদে দ ন এলঅ। অন্তত তারা সেই সময়অত নিজ জাদর গম কিজু এগ্গান চিদে দ গুজ্জোন বা গুরিবাদ্দেই চিওন(তারার নানা ভুল থেই পারে)  সিআনওই দ আমাদ্দেই গরবঅ গুরিবার মত!

আনন্দ বিকাশে তা লেঘাগানঅত ধরমঅগানঅ কধা তুল্লে। মানে হিন্দু ধরমঅ সমারেও দ হিল চাদিগাঙঅ  জুম্মউনোর ধরমঅ ন মিলে। সতুরাং বানা ধরমঅ চেনেই স্নেহকুমার দাঘি ভারদত থেবার সিদ্ধান্ত লনাগান তার(আনন্দ বিকাশ)  মতে ভুল সিদ্ধান্ত।

বিষয়আন দ আজলে ধরমঅর বিষয় ন এলঅ। বিষয়আন সিত্তুন বেচ এলঅ। এগে পাগিস্তানঅর যারা শাজনগুরিয়ে তারা অহলাক্কে হাজার মেল দুরঅত, তা উগুরে হিল চাদিগাঙঅর জুম্মোউনোর আল্যাক(সংস্কৃতি) বা জীবনাচরণ দ আজলে বৃহত্তর ভারতীয় জীবনাচণঅ ধূক্কেন। শাজন গুরিয়ে পজিম পাগিস্তানীউনো সমারে আমার সিআন ন মিলে। আর কংগ্রেসে সে সময়ত জেনজান গুরি গণতান্ত্রিক পদ্ধতির শাসনঅর কধা কুইয়ে সিআনঅর কারণেও দ স্নেহকুমার দাঘি ভারদর পক্কে জেবাত্তেই চিওন।

কামিনী মোহন দেবানঅর ‘পার্বত্য চট্টলের এক দীনসেবকের কাহিনী’ মু্ই ভালকদিন আগে পুজ্জোঙ, বোইবোও কুরে নেই। সেনত্তেই তথ্য আরঅ দি ন পারিলুঙ।

 

আর সে সময়অত পাগিস্তানঅ পককের পার্টি মুসলিম লীগ দ এলদে সাম্প্রদায়িক এগগো সংগঠন আর ভারদর কংগ্রেস নাঙে অন্তত অসাম্প্রদায়িক সংগঠন এলঅ। সুতরাং সেই কারনেও দ আমার সে সময়অর দেচজাদ লোনেই চিদে গুরিএগুনে সিআনি মাধাত রাগেনেই ভারদর বাবদা(পতাকা) উড়েইওন।

তারার চেতনা এলঅ কিনে তারা সেই কামআন গুজ্জোন।

তারা নিজর জাদর স্বকীয়তা স্বাধীনচেতনার প্রতিনিধিত্ব গুরিবার চিওন। এবং ইআনত্তেই বানা তারা সম্মান পেবার যোগ্য! বাগি যে তারা ধেই জিওন! তারা জে জাততোরে অভিভাবক আহরা গোরেই ফেলেই জিওন সিআন লোনেই মুইও সমালোচনা গরঙ।

ইওত আর আনন্দ বিকাশ চাঙমার লেঘাগানঅ উগুরে মুই কধা ন বাড়েম। আনন্দ দাঘি ইনভারসিটি মাস্তর। তারার ভূমিকা বুউত বুউত আঘে। তারা জাদর বিজগর চেতনা ধারণ গুরিবাক, সিআন মুই বা আমি আঝা গুরি। তারা সিআন তলাত ফেলেবাক সে আঝা আমি ন গুরি বা গুরিবার ন চেই। যাওক তারে ম পক্কত্তুন ভালেদি থেব’, তে মুজুঙে দোল ভূমিকা রাগেবঅ এই আঝা থেলঅ।

 

বিজগর চেতনা ন ধারেলে সিআনঅত জাঙারে ধুরিবার সম্ভাবনা থাই। সেই চেতনারে লালন গুরিবার চাঙ কিনেই মুই কাররে বড় কধা কোই পাঙ। ন অহলে কাররে মনত দুগ দিবার মর মুঞ্জুক নেই।

বেগরে ভালেদি।

Advertisement