এই পোস্টটি ৩০৫ বার পড়া হয়েছে


গম মানুচ বা’ঝি ল’না, বুঝেদে মানজোর দুঘ’ত ন থানা

সমাজ্জে একজনদোই কধা ক’দে ত্যা ক’লঅ, গম মানজোর ভাত নেই আর বুঝেদে মানজোর শান্তি নেই।

তারে কোলুঙ, গম কারে কয়? গম মানুচ কারে কয়? গম অহলে তার ভাত ন থ্যালেও রাত দ নেই! গম মানে ত্যা মনে গম, কামে গম, কধায় গম,চলনে গম, মানজোলোই মিল’নে সিল’নেও গম, ত্যা তা সমাজ্জেলোইও গম। আর শত্তুরলোইও ত্যা নীতি নিয়ম রক্ষা গুরিনেই শত্রুতা গর’দে গম!

 

 

তারে কোলুঙ, পিত্থিমিত গম মানুচ চিন’দে কষ্ট! য্যা গম গরে বা মানজোর গম চাই, ত্যা গম গত্তে সলাত মানজো সিআন বজঙ নাঙঅ দিই পারন। পো শা’ রে গম গত্তে শাজন গরা পরে, বজঙ কামঅত্তুন তারে ফিরি আনিবাত্তেই তারে কষ্ট দিআ পরে। রোগীরে গম গুরিবার চ্যালে তারে দ’ তিদে হাবা পরে, তারে মনে ন কুইয়্যে জিনিচ হাবা পরে।

 

রঅস্য বা রহস্য গুরি তারে কোলুঙ, গম মানুচ দ হানক্কনে চিনি ন পারে। মানজে তারে বজঙ কন, ত্যা বজঙআন দেএই ন পারে কিনেই।

গমআন মানে সার-আন, রিবেঙআন।

 

আর বুঝেদে মানজোর শান্তি ন থোক, তার সুখ থাই! কারণ, ত্যা বুঝে, ত্যা বুঝি পারে, ত্যা গম বজঙ ভাগ গুরি পারে। ত্যা গম ভ্যান্যা বাজি লোই পারে, ত্যা মানজোর গম গুরিবার চাই। ত্যা গমআনই চাই।

তার সুখ থাই, কারণ ত্যা যা গরে বুঝিনেই শুনিনেই গরে।

তার দুক অহলদে ত্যা যা গরে মানজে সিআন ন বুজোন, মানজে তারে ন বুিঝিনেই ভুলও বুঝঅন।

হালিক ত্যা সিআন’ত্তেই অশান্তিত থ্যালেও ত্যা সুগি। কারণ ত্যা হবর পাই দুক আর সুক দোনোআন লোইনেই থা পুরিবঅ। ত্যা সুগি কারণ ত্যা সুক তোগেই জানে, সুক কিঙিরি পাই সিআন ত্যা হবর পাই।

তারে আরঅ কোলুঙ, গমে বজঙেই জিঙানি। বুঝেদে ন বুঝেদে ন বুঝেদে মানেই লোইনেই জিঙানি। জিঙানিআনঅত সুক চ্যালে গমআন লোই পরে, বুঝেদে মানুচ ওই পরে।

Advertisement