এই পোস্টটি ২৭৩ বার পড়া হয়েছে


সাহিত্য সম্মেলন খাগড়াছড়ি ২০০১ প্রচারপত্র: ধগেধাগে ছির গেলঅ হিল চাদিগাঙ’ নবীন লিঘিয়েউনোর জদামেলা

খাগড়াছড়িতে ২০০১ সালে স্কুলের ছাত্রছাত্রীদের নিয়ে যে সাহিত্য সম্মেলনের অনুষ্ঠান করা হয় তা শেষ হবার পরে চাঙমা ভাষায় একটি প্রচারপত্র প্রকাশ করা হয়। উক্ত প্রচারপত্রটি আমি নিচে শেয়ার করলাম।

 

প্রচারপত্রের শিরোনাম: ধগেধাগে ছির গেল’ হিল চাদিগাঙ’ নবীন লিঘিয়েউনোর জদামেলা

প্রকাশকাল:  জুন, ২০০১

বক্তব্য:

“Chittagong Hill Tracts Young Writers Convention’ মারমা উন্নয়ন সংসদ’ দিতালাত কিজু নবীন লিঘিয়ে জুম্ম পোউনোর অ্যাজালে ১৬-১৭ জুন দি-দিন ধুরি চুলিনেই শেজ ওই জিএগোই।

এ জদামেলা(Convention)-র পোল্লেম দিনোত উদ্বোধনী অধিবেশনঅত ‘হিল চাদিগাঙঅর ইঙিল্যে অবস্থাত নুও লিঘিয়েউনোর ইঙিল্যে এবং মুজুঙো দিনোর ভূমিকা’ নাঙে এগ্গান কধা লোনেই তেম্বাঙ গরা অহয়। এ তেম্বাঙ বিষয় লোনেই কধা কো-কি গুরিবাদ্দেই এলাক হিল চাদিগাঙঅর মাধাবলা মুহধোত গনাজিএ শদ্ধেয় অনন্ত বিহারী খীসা, জুসাসঅর তলবিচ গুরিয়ে কাবিদাঙি শ্রদ্ধেয় বিম্বিসার খীসা, আর গম লিঘিয়ে রোজিয়্যে অংক্যজাই মারমা টকি।

এ তেম্বাঙঅত হাগারাছুরি ইস্কল’ জুম্ম মাস্তরউনোরেও এবাত্তেই কোজুলি গরা অহয়।

এ বাদেও এ গম কামান লোনেই কধা কুইওন শিপচরণ সাইত্য কেন্দ্রর রুপন, মধুপুর জুম্ম ছাত্রছাত্রী উন্নয়ন সংগঠনঅর ফগদাঙি “উদো‘-র পক্কত্তুন রূপন চাঙমা, স্ফুরণ-অ পক্কত্তুন মিঠুন চাঙমা আ: পাহাড়ি ছাত্রছাত্রী সংগঠনঅর পক্কত্তুন বিজয়া চাঙমা, চন্দন ত্রিপুরা। তেম্বাঙান চালিএ সরসিজ চাঙমা।

এ তেম্বাঙঅত তেম্বাঙবলাগুনে জদামেলাআন’রে গম কাম ভিলি কুইওন। আর তারা কুইওন, হিলঅত ইক্কো জেনজান গুরি মদ-ভাঙ-হিরোইন-ফেনসিডিল হেনেই পুরি থান। সে বাদেও জে গম কাম, দোল কাম গুরিবার চেরেত্তা গরা অহয় সিআন নুও লিঘিয়্যে পোউনোর উদ্দোগকান দেঘিনেই্ বুঝা যায়।

অনন্ত বাবু ভালক্কন ধুরি কধা কোইনেই আমা নিজঅ ভাজঅনদি প্রাইমারী ইসকুলঅত পড়ালেঘা গুরিবাদ্দেই সরকারঅর উদ্দোগঅর আহউচ গুজ্জে।

বিম্বিসার বাবু সাইত্য আল্যাক(সংস্কৃতি)-অ যে রাজনীতির বারে নয় এই কধাগান কুইয়্যে নিজঅ অভিগগতা বনননা গুরিনেই।

অংক্যজাই মারমা টকি ইঙিল্যে পোউনোর পড়ালেঘানদি ঝুক নেই ভিলি কুইয়্যে। আর এনজান কাম জিউনে গত্তন সিউনে তা সিদু যেকোন কামঅত্তেই গ্যালে ত্যা হুজিমনে অ্যাঝাল দিবঅ ভিলি কুইএ।

তিঘনদা ধুরি চুলিনেই তেম্বাঙআন শেজেনদি দুইটায় বিদি জায়।

পরেনদি পোউন’রে লোনেই জদামেলা গরা অহয়। এ জদামেলাত পোউনে ঘুরবো গিরিত্তিত্তুন তারারে গম কামঅত বাধা দেনা লোনেই কধা কুইওন। তারা আমা জাদঅর নিজঅ ভাচ আল্যাক আক্কোই নেজেবাদ্দেই কাম গুরিবার কধা কুইওন।

দি দিনঅত পোউনে হাগারাছুরিত পোছাউনোর সাইত্য মান বাড়েবাত্তেই জুলা্ই মাহজত্তেই কিজু কাম আহদঅত লুইওন। কামআনি অহল’-

১. দেইল্যে কাবোচ ফগদাঙ গরানা(দেয়ালিকা)।

২. বুলেটিন ফগদাঙ গরানা।

৩. পত্তি বিষুববারে সাইত্য আল্যাক লোনেই তেম্বাঙ গরানা।

৪. এজেত্তে মাহজত হাগারাছুরি ইসকুলঅত কুইজ হারা লড়ালড়ি দেনা।

 

এ কামআনি দোলেদালেই সারা গুরিবাদ্দেই তলেদি আচটো জনঅরে দায়িত্ব দিআ উইয়ে। তারা অহলাক্কে- সরসিজ চাঙমা, চন্দন ত্রিপুরা, এনজয় চাঙমা, তুঙকা চাঙমা, কৈনপারঙ চাঙমা, বিপিন চাঙমা, কপিল চাঙমা, বিজয়া চাঙমা।

(CHT Young Writers Convention-অ অ্যাজালে এ পাদাগান ফগদাঙ গরা উইয়্যে আর ছোরেই দ্যার জুম্ম ছাত্রছাত্রী সাহিত্য সংঘ।)

Advertisement