এই পোস্টটি ২৫৭ বার পড়া হয়েছে


শিপচরণ সাইত্য কেন্দ্রর পুইল্যাম কাম

২০০০ সালঅ লক্কেনে শুভাশীষ দা আর মুই একবার বান্দরবান থানছি জিএই। সিদু যে চাঙমা আদাম আঘে সিদু এলঙ। সিদু আমি চাঙমা বৈদ্যগুনোরে লোনেই চাঙমা ভাচ আ ওক্কোর লোনেই এগ্গান তেম্বাঙ গুজ্জেই।

সিআন গুরিনেই ঢাকাত এবার পরে মুই সিআন লোনেই এগ্গান প্রতিবেদন লিক্কোঙ চাঙমা কধানদি। সিআন মুই বলগঅত শেয়ার গরঙর।

 

শিপচরণ সাইত্য কেন্দ্রর পুইল্যাম কাম

শিপচরণ সাইত্য কেন্দ্র তা পুইল্যাম কাম সারা গুজ্জে। শিপচরণ সাইত্য কেন্দ্র গ্যাল্লে ১০-১১ তারিক(সাল ও মাস লেঘা নহ অয়) সোমবার আ মঙলবার বান্দরবান জেলার থানচি থানা সিদু চাঙমা বৈদ্যউন লোনেই চাঙমা সাইত্য সুল্লুক/অঝাপাত সুল্লুক নাঙে এগ্গান সুল্লুগ কাম আহদত লোআ উইয়ে। সিওত চাঙমা সাইত্য আ বুউত জিনিচ লোনেই তেম্বাঙ গরা উইয়ে। সে তেম্বাঙঅত থানচি বলিপাড়ার মোদেমাদে ১০ জন বৈদ্য এলাক। আ শিপচরণ সাইত্য কেন্দ্র পক্কত্তুন শুভাশীষ চাঙমা, মিঠুন চাঙমা দাঘি সিওত অংশ লু্ইওন।

দি দিন ধুরি চুলিয়ে তেম্বাঙঅর পুইল্যাম দিনঅত চাঙমা অঝাপাতঅর ওক্কোর বা আরুক লোনেই এবং সিউনোরে কামঅত লাগানার লবাদচ্যা ব্যপার লোনেই সুল্লুক গরা উইয়ে। জেরে দিননোত চাঙমা সাইত্য বিচেচগুরি হিল্যা সাইত্য লোইনেই আলোচনা গরা উইয়ে।

এ সুল্লুগত শিপচরণ সাইত্য কেন্দ্রর পক্কত্তুন কিজু প্রস্তাব সুমুত্তো এগ্গান লেঘা দিআ উইয়্যে। সে লেঘাআনদোই পুইল্যাম দিনোত বৈদ্যউনদোই তেম্বাঙ গরা অহয়। সে তেম্বাঙঅ শেজেনদি চাঙমা অঝাপাতঅর কিজু ওক্কোর বা আরুক বাদ দিবাত্তেই শিপচরণ সাইত্য কেন্দ্র পক্কত্তুন কোজুলি গরা অহলে বৈদ্যউনে সিআনঅ ব্যাপারে একমত উইওন।

তার পর দিনোত চাঙমা সাইত্য বিচেচগুরি হিল্যা সাইত্য লোনেই তেম্বাঙ গরা উইয়্যে।

এ তেম্বাঙঅত তাহ্লিক শাসতরঅ, বারমাচ্যা, হোবিতে, গোজেন লামা সুমু্ত্তো চাঙমাউনোর নানা বাবত্যে হিল্যা সাইত্যরে আমা জাত লাগেবার গুরুত্ব লোনেই কধা উত্তে। সিআনি ধুরি রাগেবাত্তেই লেঘাপড়া জানি্য্যে চোকমুফুত্যে মানেইউনো সিদু কোজুলি গরা অহয়।

দিদিন ধুরি এ সুল্লুক চুলিনেই শেজেনদি আরঅ ইদিক্কেন সুল্লুক হিল চাদিগাঙঅর নানা জাগাত গুরিবার ধারোচ গরা উইয়্যে।

 

Advertisement